على كل ماتمر يجبرني حسن البيك

الواحد فرد مايقبل التقسيم

بس آنه انقسم وبدونك اتعدد

اتقسم بدونك وانجمع وياك

لان كلي ويكلك بيك يتوحد

جنت جاهل واجيك اتشرد من الناس

هسه اتعلمت من نفسي اتشرد

عشكتك ذره ذره وصرت اغار عليك

اذا محد يبوسك اذبح المحد

ولك لاتنطرح يم ناس تعبانين

مو طولك حصار اشلون تتمدد

وشعرك ليله ضلمه اتوحشت عالريح

كل ماهب عليها تلفلفه ابسود

وجبينك ايد موسى المعجزة البيضاء

مو حقه الكفر من والشافك اتعبد

وفراشة نور اذنك والزلف خطار

مرة يحط عليها ومرة يتبعد

وجفينك سما ومجفي اعله رمشك ليل

ودموعك نوارس لو مشت عالخد

وعله خدودك صور منقوشه من بوسات

اباوع عالصور مابايسك احد

وشفتينك شمس من تبتسم نصين

يقطعها البرق وبنصها يتجمد

وحنجك صدر بجعه انصاغت من النور

اذا ماتت شمس من نورك اتولد
ماتمر يجبرني البيك

ومثل زمزم ركبتك نص ذهب نص جام

وعين الماي هاي ال عالصدر تركد

ونام اباب صدرك واذنب وانخاك

كبتين الذهب ماتشفع لاحد

يبو ايد الثلج لاتطلع ابتموز

موخاف الثلج خاف الخلك تبرد

واذا لا مو ثلج هذا البياض منين

معقوله العضم فوك الجلد يصعد

يل جتفك منارة بيا شرع يادين

اموت من العطش وكبالك اتشهد

وحدر جتفك فرات ودجله ملتقيات

وشفت شط العرب جوة الجتف ممتد

واباوعالبطن مو ركبة الدلفين

لاعين الحياة بصرتك تركد

يبو تاج الكطن لين افتحلك باب

مو خاف الكطن بالعين يتفرهد

خطواتك حضارة وخصرك التاريخ

اذا تمشي العرب فوك الفرس تصعد

وعلي كل ماتمر يجبرني حسن البيك

اوصفنك لجن من وصفك اتردد

لذلك ماوصفتك واعتذر يهواي

وصفت الخيال المنك تولد