رائعه جديده للشاعر ضياء الميالي

اليوم انقل الكم رائعه جديده من روائع الشاعر العراقي البطل ضياء الميالي اتمنى تنال رضاكم او اكيد راح تنال رضاكم

ليّغرك صــديج النــاعم أيصــــــير
زنجــار الفشكَ يعمــي الشواجيـر
أكو ويه الكَاع يمشي امخوف الكَاع
وأكــو شما زاد طـوله يبين اكَصير
أباب الخــوف ظلت بس الأحــــلام
وعله حيطانة خـــــرسة التصاوير
شلنه حروفنة بتــــــابوت الأقــــلام
وكَمنه نكَــــول خــــــانتنه التعــــابير
القلم صح من خشب بس يكتب أفكار
مــــــــآ يكتب جرح سن المنــــاشير
أذا شــــــــح مايهه تموت البساتين
وتفــــك حلوكَهه اعليهه السواطــير
و أذا كَصة النهر ما تعركـَ المـــــاي
النهر بي صوج شعليهه النـــــواعير
وأذا مات الشجر ماينطي الفيـــــــاي
ويظلّ سالوفــــة بحلوكَ التنانــــــــير
عله كَلب السمه لا تشمر حجـــــــــار
الطيور بلا سمه مـــــــــا تعرف تطير
اليشم خد الورد خل يقره آيــــــــــات
الورد قرآن ما يحتـــــــاج تفــــــــسير
الغصن ماله ذنب لو حولوه فـــــــآس
الغصن مخلوق لبيوت العصــــــــافير