اجمل الابوذيات المتنوعة

رخا جسمي علمودك منرخه اصتك
واسومن بيك غالي من رخصتك
دست فوگي تگلي من رخصتك
حتى براحتك تسحگ عليه

بعسر غير النوايب فاتحت من
وسهم غدرك بگلبي فات حتمن
أكتلتني وجاي تنشد فاتحة من
ولاچنك رحت جناز بيه

صديجي وياي شوگبح وخصم
وخبن من ثوب عشرتنه وخصم
ضل يحچي بحجي ماصخ وأخذ صم
ملح ذره على جرحي وكفر بيه

بچتلتي بسيف ويه أعداي برزخ
وعلي زخ المطر شر موش بر زخ
وين أنطي الوجه وأصبحت برزخ
حياتي وبعد برزخ للمنية

شعجب كل يوم تتراخى وچلباك
الدغش وكر على گلبك وچلباك
نخيتك گمت تتمضحك وچلبك
عرگـ وجهه وبچه اعله ألصار بيه

اعتنه الشامت لعد جرحي شلالي
و عگب ما صارت الخوه شلالي
چتفني ابن أمي وچلبه شلالي
الچلب هو الفزع لي وفك أديه

الليالي لوغ بالمامش لغني
ومن طاري الفرح كلش لغني
لا ون لا لي حيل أبچي لغني
الينفهنلي الگلب ظاعن عليه

انوليت وحشمتكم شاب والشيب
ونار أعداك بيه أسعرت والشيب
فزع بس الدمع وياي والشيب
طلع من شاف ما بيكم حميه

هله يالوالفاك الگلب ولفيت
نشف ريجي وعليه اگبلت ولفيت
أريد اخطف عله الشمات ولفت
نضرهم من تحط أيدك بديه

حچوا حچيه بتعالي برتقاله
وضحك والضحك جنه بر تقى له
استحه وانگلب وجه برتقاله
عصرته أنعصر كلبي بين أديه

بعد عيب أوگف بابك ولطراگـ
وحرام الچان أسچ دربك ولطراگـ
بعصه ما يطگ ربك ولطراگـ
تجيك ملبلبه بساع المنية

ألف شاطي ألدره بضيمي وألف راگـ
وعذابك فت جرح گلبي والفراگـ
وعلي من اذكر أيامك والفراگـ
اگول شواية الله اعله ألمنيه

التاريخ چفي أرخ ميدس
سم وجدمي فوگه ارخميدس
صفت قاعدة گلبي ارخميدس
بقدر وزنك محبه تفيض بيه

ألف چانون بجروحي دوه الهه
أعجزت كل الخلگ توصف دولهه
ديار الگبل چنت اسمع دوي الهه
أذب ابره صداها يرد عليه

طرب تسمع العاذل كيف أذانه
علينا و ما دريتوا كيف أذانه
بوصلكم گوه عايش كيف أذانه
جفاكم جار خمس سنين بيه

الحدث يا دار ما خله لهلفچ
ولا هو لافني بعمري ولهلفچ
كلاچـ الدهر من هل الفچ لهل فچ
وعلي ما أظن تسلمين برحيه

گلبي الجان ينبض بيه بيرق
اخوي وروغته على البطن بيرق
تاليها كتلني وشال بيرق
يمش بالدمع ويهوس عليه

الدمع يم الشماتة راد اكته
زماني وسر عشگنه راد اكته
شبيده الگلب يسمر راد اكته
جبت غيرك شهر بدل عليه

انه بگد شعر راسي جاي عاني
منه وعلي يضحك جاي عاني
اگضي العمر كله جايع آني
أموت ولا اگله الحك عليه

سچاچين الوكت بحشاي بردان
حزني وصرت بالصيف بردان
صرت مجبور اشد ردان بردان
ولا مد للشماتة اثنين أديه

يجاملني حبيبي وأنس جمله
ودومه ينسجم لي وانسجم له
اسولف كلشي عندي وانسه جمله
بذكره انسه ألحچيناهن سويه

روحي ألما تعن فرگاك عنها
وهسه أتداركت ما بشر عنها
ما تنشد ولو بالجذب عنها
ملك الموت ضل ينشد عليه

أتلفت خايب تعال وشوف تلفاي
اون وصار إلي شوغات تلفاي
ولك ردتك تبيض الوجه تلفي
مو تجفي وتبيض الراس إليه

جرحك ما بره ولا دار حوله
بدليلي ومن اجيت اشترك حوله
الوكت يخزر عليه بعين حوله
سلب روحي وطلع مشتبه بيه

بچيت بحركتي بجفاك وسال
دمه وحل معضلات العلل وسال
العسر كلش شبگني شبگ وسال
انسدح يمكن لگاله فراش بيه

هنا ياللي تبج گلبي حلبچه
مدام اعله المشوا عنه حلبچه
عگال الهور من ضربوا حلبچه
هوة وخرطت خدهه الناصرية

يحومي طير شوگي للسماوة
يطگ بالثرى ويصعد للسماوة
دفعت الجسد گوه للسماوة
وبقت روحي بگراج الناصرية

شكثر بأسم الاوده لجلساني
بمحنته نار كبرى لجله ساني
على دروب الشماتة لجلس آني
وركبة ونص گعدتي تصير هيه

يفر دولاب وكتك سربسدري
واخذ كافور سدري وسربسدري
قبل خلقي حملتك سربسدري
ولهسه ما حچيتك حتى إليه

ببياب العين ما عنت وجافيت
إلك يالگوطرت عني وجافيت
سهمك عاين بحرگه واجه فيت
بدليلي ولا ضمد يلحگ عليه

اعذره الگلب من يزهگ وحگلاه
حگله همومكم فوگه وحگلاه
آني ادري لو طحت يمكم وحگ لا
اله إلا هو تگطعون بيه

ضميت وطارش بحورك ميانة
واجيت اشرب من شفافك مي آنه
لگيت السامة وي خدك ميانة
تحچي وتاكل وتشرب سوية

سهم غدر النذل بحشاي خش ما
طلع وبگصته ما طلع خشما
يحاچيني بگبح من ره خشمه
وانه خشمه شكثر فركنه أديه

» احدث الابوذيات العراقية
» بعض مشاكل و اعراض الحمل المتنوعة
» اجمل الرومانسيات
» اجمل صور للاطفال
» اجمل عيوب المرأه