ظل هناك خالي وعيش مرتاح

ظل هناك خالي وعيش مرتاح
وانت بكيفك وتعرف مصيرك
للمرة الاخيرة وياك الاعتاب
صدگني ابد مو قصدي اثيرك

اذا زعلان مني انطيني اسباب
وابقى بعيد بس حكم ظميرك
مو سهلة علي ّ انا اول انسان
يبدي بعشرتك ويصير اخيرك

وفرض حبيت ثاني مودع وروح
واتركني وبعد ماظل اسيرك
كتابي انت وحرامي الباگك بليل
هسة من الحرامي انا استعيرك

حسافة شگد حسافة التامنه يخون
وانا امنتك على ايامي وشبابي
ولجلك قفلت عل الروح بيبان
والك بس انت ظل مفتوح بابي

احس انا بعذابك گبل لدگول
وانا اتحداك اذا تدري بعذابي
ولااحمل غيابك ولو لحضات
وانت سنين تتحمل غيابي

اخاف انسئل عنك وانجرح خاف
اذا يختلطن ادموعي وجوابي
بگاي رماد هسة وياك ظليت
بعد شيفيد من تسمع عتابي

اخذني وصيح بيه بصوت دلال
وبيع بأي سعر واخذ التريده
يكفيني الگلب متروس طعنات
مايحمل بعد طعنة جديدة

يكفينا انتهينا وصار ماصار
واحرگها لمن تگضي القصيدة
صرت مثل اليفز من نومه حلمان
وصرت مثل الطفل من يگضي عيده

وتدري انت عرفتك گبل هالناس
وغيري بهل الزمن ياهو الوفالك
صح ممكن چنت محسود وياك
وهواي من البشر رادو وصالك

لكن لعبة صدگ رادو اتصير
سلعة بعينهم شافو جمالك
رادو ماظل باوراقي مكتوب
ورادو مايظل اسمي على بالك

علي ّاستكثراك الگلك انساه
وانت شلون امنته الحچالك
حظك عثراك وآمنت بيه
لو مكتوب لك هذا الجرالك

رحت عني ومشيت بلاي اسباب
وبقيت الوحدي ومناطر خيالك
انجرح صوت البلابل والشجر مات
جرح غنى بلحن بچى البساتين

وگمر ليل الشتى تلثم بالغيوم
بچى وكل گاع صحرى تحولت طين
بچى وياك الورد مارادك تروح
بچى وسكته انذبح فوگ السچاچين

واجت ليك القصايد باول الليل
وأخر ليل ردت بس عناوين
حرگ نفسه الزمن من راد ينساك
وظل منه رماد وياي للحين

اطشه ونص المه ونص خذه الريح
واظل اركض والم مثل المجانين
من هذا عرفته اليوفي خسران
وغريب اسمه انكتب فوگ الحياطين

للشاعر المبدع
ايهاب المالكي

» ما مرتاح .. ما مرتاح .. مامرتاح
» ليس هناك فشل و إنما تغذية راجعة
» هناك مفاتيح يصعب علينا إمتلاكها